Berisha: Me Ramën bashkëpunoj për qytetarët

Kryeministri Berisha deklaroi dje se mes tij dhe kryebashkiakut Edi Rama nuk ka asnjë bashkëpunim, përveç atij institucional. Por nëse më parë Lëvizja Socialiste për Integrim aludonte për "marrëveshje biznesi" mes Ramës dhe Berishës, tani duket se ka gjetur dhe provat. Një lejë ndërtimi e dhënë nga Bashkia e Tiranës për një objekt banimi dhe privatizimi i ambienteve të klubit sportiv "Partizani", është fakti që tregon bashkëpunimin mes kryeministrit dhe PS-së. Një nga argumentet e LSI-së është se një prej përfituesve të kësaj leje ndërtimi është direkt dhëndri i kryeministrit Berisha. Dje sekretari për Marrëdhëniet me Publikun në LSI, Luan Rama u shpreh se do të denoncojë në prokurori "aferën mes Ramës dhe Berishës". Nga ana e Bashkisë së Tiranës deri më tani nuk ka pasur asnjë reagim për këtë çështje. Ndërsa dje palëve u është shtuar dhe një tjetër. Pronarët e zonës ku do të bëhet ndërtimi kanë reaguar, duke thënë se prona e tyre po përdoret për interesa politike.
LSI: Dialogu i Ramës me Berishën
Për LSI-në bashkëpunimi mes Partisë Socialiste dhe asaj Demokratike për ndryshimin e Kushtetutës, reformën në sistemin zgjedhor e ka bazën në marrëveshjet personale mes Ramës dhe Berishës. "Përmes provash shkresore, përmes një morie dokumentesh zyrtare që LSI i disponon, provohet se i gjithë i ashtuquajturi proces i dialogut politik midis kryetarit të PS-së, përkatësisht edhe kryetar i bashkisë së Tiranës, dhe kryetarit të PD-së, alias edhe kryeministër i vendit, apo thënë ndryshe, bashkëpunimi midis Edi Ramës dhe Sali Berishës ka në bazën e vet interesa korruptive që përkthehen në leje ndërtimi, në tjetërsim të sipërfaqeve të gjelbërta dhe në cenim të cilësisë së jetës së qytetarëve", tha Luan Rama, sekretari i LSI-së për Marrëdhëniet me Publikun. Por akuzat e bashkëpunimit janë hedhur poshtë dje nga kryeministri Berisha. Duke ju përgjigjur interesit të mediave për këtë çështje, nga Vlora ai deklaroi se "me zotin Edi Rama, kryetarin e Bashkisë së Tiranës dhe me zotin Shpëtim Gjika, kryetarin e Bashkisë së Vlorës dhe të gjithë kryetarët e bashkive dhe komunave të Shqipërisë, kam pasur, kam dhe do të kem, për aq kohë sa të jem në pushtet, një bashkëpunim në interes të qytetarëve dhe tërësisht transparent".
Reagimi i pronarëve
Por mes debatit politik të ditës janë futur dhe pronarët e ambienteve të Klubit Sportiv "Partizani". Në bazë të vendimit të Ministrisë së Ekonomisë ata përfitojnë njohjen e pronës në këtë hapësirë publike si pronarë të ligjshëm. Argumentet që përdor Lëvizja Socialiste për Integrim duket se nuk i bindin, përderisa dje kanë deklaruar se do të bëjnë një kallëzim penal në prokurori për LSI-në. Sipas përfaqësuesve të tyre, çështja është politizuar pa të drejtë dhe LSI po e përdor atë për interes të ngushta politike. Nga ana tjetër, në deklaratën e saj LSI thotë se procedurat për privativin e këtij trualli kanë nisur para se Parlamenti të miratonte ligjin për sportet.