Italia “dëfrehet” me Belgjikën

Italia është gati për t’u nisur për Vienë, ku më pas do të udhëtojë në Baden, qyteti që do të presë kombëtaren axurre, për “Euro 2008”, një eveniment ky që do të zhvillohet në Austri dhe Zvicër. Miqësorja e mbrëmshme, e fituar 3?1 ndaj Belgjikës, “i dorëzon” Roberto Donadonit, trajnerit të kampionëve të botës, një skuadër e cila gëzon shëndet të plotë dhe përcjell shumë siguri, edhe pse goli i pësuar në minutën e fundit shtesë nga Sonk është një tolerim i mbrojtjes, por që mund të qëndrojë, në një takim i cili shërbeu më tepër për të testuar futbollistët. Donadoni e ka nisur me një formacion të përbërë nga shumica e lojtarëve të cilët ishin pjesë e skuadrës që arriti të kualifikohej për në Europian. Surpriza e vetme, Akuilani titullar në mesfushë, përkrah “gjeniut” Pirlo, por të dy fantazistë të aftë për të dhuruar pasime të arta në sulm, ashtu si mesfushori i Milanit, i cili me një “shpikje” nga krahu i djathtë kroson në të majtë për Di Natalen, që me një gjuajtje fluturimthi shkund rrjetën belge. Italia luan mirë dhe kontrollon të gjitha repartet pa asnjë rrezikshmëri të kundërshtarit. Toni provon me kokë dhe tifozët e pranishëm në “Artemio Franchi” të Firences duatrokasin bavarezin si një ish i Fiorentinës. Belgjika provon në të gjitha mënyrat për të kaluar “murin” e mbrojtjes të formuar nga Kanavaro, Barxalji, Zambrota dhe Panuçi. Ndërsa, në mesfushë, është Kamoranezi “pistoni” që shtyn më shumë dhe në pjesën e dytë goli i tij është i merituar, i pasuar nga një asist perfekt i Del Pieros, i aktivizuar pas pushimit. Ka vend edhe për Kasanon, Ambrozinin, Kielinin dhe Borrielon, me këtë të fundit i cili gabon fare pranë portës. Disa raste të shumta të axurrëve nuk konkretizohen.