Talenti shqiptar Hyka te Mainz, 1.6 mln euro në dorë për 4 vite

Përfundon telenovela Hyka. Një ndër talentet më të mëdha të futbollit shqiptar ka arritur të konkludojë dje një transfertë rekord për moshën e tij duke firmosur për skuadrën gjermane të Bundesligës 2, Mainz. Lojtari do të përfitojë 1.6 milionë euro për katër vite (duke përjashtuar taksat) dhe do të luajë nën ngjyrat e klubit gjerman. “Në momentin e fundit kam vendosur – tha Hyka nëpërmjet linjës telefonike, pasi për momentin gjendet në Gjermani – Dinamo Zagreb kërkonte sot (dje) një përgjigje nga unë. Ata ofronin 45% më pak se sa klubi gjerman. Vura në peshore si anën financiare ashtu edhe atë profesionale. Mainz është një klub ambicioz dhe ka gjasa që edicionin e ardhshëm të luajë në Bundesligë. Mendoj se kam bërë hapin e duhur për karrierën time”. Ndërkohë në Kroaci kanë mbetur të zhgënjyer nga firma e Hykës. Dinamo Zagreb kishte planifikuar vizitat mjekësore të lojtarit ditën e enjte dhe në prezantimin do të merrte numrin e Modriçit, i cili u largua për në Angli. Mainz edicionin e shkuar u rendit në vendin e katërt dhe për dy pikë nuk arriti të dilte në Bundesligë.