Të ndërtojmë një Europë gjithëpërfshirëse dhe jo përjashtuese

Jozefina TOPALLI


Të ndodhesh në një audiencë universitare, mes personaliteteve akademikë dhe politikë, është pa dyshim një kënaqësi e veçantë. Është, gjithashtu, një nder dhe privilegj për mua të marr fjalën pas një personaliteti si Romano Prodi, një miku të madh dhe mbështetësi të fuqishëm të Shqipërisë dhe shqiptarëve. Ndihem shumë e kënaqur që po flasim sot për një temë që unë e kam shumë për zemër, integrimin europian dhe në mënyrë të veçantë diplomacinë parlamentare. Po diskutojmë në një kohë kur një erë e re po fryn në Shqipëri dhe në Ballkan, era e paqes dhe e stabilitetit, era e progresit, e përafrimit me familjen europiane. Siç ju e dini, vendi ynë ka përjetuar një histori të vështirë, por është e sigurt se asnjë shtet nuk ka rekuperuar kaq shpejt kohën e humbur, duke pësuar transformime kaq të mëdha, në një kohë kaq të shkurtër sa Shqipëria.

Besimi ynë në vlerat e lirisë, demokracisë, shtetit të së drejtës, por mbi të gjitha ëndrra shpresëplotë e shqiptarëve për t'iu bashkuar familjes europiane, së cilës natyrshëm i përkasim, kanë qenë promotorët e këtij transformimi.

Në qershor të vitit 2006, tek sa ndiqnim në sallën e Parlamentit nënshkrimin e MSA-së Shqipëri-BE, besoj se askush nuk mendonte se ritmi i ratifikimit të saj do të ishte unik dhe sot, pas dy vitesh, besojmë se do të përmbyllim këtë fazë të rëndësishme për t'i kërkuar BE-së statusin e vendit kandidat për anëtarësim. Firmosja e kontratës me Europën ishte një besim që iu dha kësaj mazhorance për të udhëhequr reformat dhe kjo mazhorancë po justifikon bindshëm këtë besim, duke shenjuar njëri pas tjetrit sukses pas suksesi. Procesi i ratifikimit të MSA-së, thënë thjesht, është një përgjigje e vendeve të BE-së nëse e pranojnë apo jo Shqipërinë mes tyre, në Bashkimin Europian. Pra, ky ratifikim, nuk ishte thjesht ratifikim i një marrëveshje, por ishte një ratifikim, nëse mund ta quaj kështu, i reformave, përpjekjeve, rezultateve dhe sukseseve të Shqipërisë. Ishte konfirmim i besimit të vendeve të Bashkimit Europian tek institucionet shqiptare, te progresi i dukshëm, te perspektiva europiane e Shqipërisë. Nuk ishte rastësi që ky konfirmim iu dha Shqipërisë edhe në prill të këtij viti, në Samitin e Bukureshtit, ku Shqipëria mori ftesën për t'iu bashkuar Aleancës më të madhe të Lirisë, NATO-s.

Ngjarje e jashtëzakonshme për popullin shqiptar, i cili u kthye në shtëpinë e tij, në vatrën e lirisë. Falë reformave të guximshme, falë një lidershipi të fortë e të përkushtuar, ne firmosëm marrëveshjen e lehtësimit të vizave me BE-në dhe tani po bëjmë çdo përpjekje për të plotësuar detyrimet ndaj partnerëve europianë, por mbi të gjitha ndaj shqiptarëve, për liberalizimin e vizave, sepse ashtu siç e kam thënë edhe më parë, Muri i "Shengen"-it është një problem serioz për qytetarët shqiptarë, sërish të izoluar dhe në pamundësi për të lëvizur të lirë. Dhe një lajm i mirë erdhi, në fakt, para pak ditësh, se liberalizimi i vizave do të bëhet brenda vitit 2009. Pak javë më parë pata rastin të jem në një takim të përbashkët mes Parlamentit Europain dhe parlamenteve të vendeve të rajonit ballkanik, pikërisht për një temë si kjo për të cilën flasim sot: Perspektiva europiane e Ballkanit Perëndimor. Të gjithë, si përfaqësuesit e BE-së, ashtu edhe të rajonit ndanë të njëjtin mendim se Ballkani Perëndimor ofron sot një realitet të ri, me paqen, stabilitetin, zhvillimin ekonomik, perspektivën e qartë europiane. Kjo edhe për faktin se Kosova tashmë ka një status të përcaktuar qartë, si shteti më i ri në Europë e në botë.

Zgjerimi me vendet e Ballkanit Perëndimor është një provë për ne, për të vazhduar me reformat. Por anëtarësimi i Shqipërisë dhe i vendeve të tjera të rajonit në BE, gjithashtu, është një provë për vetë Bashkimin Europian, është një interes strategjik i BE-së. Zgjerimi e ka bërë BE-në më të fortë e më të konsoliduar ekonomikisht. Çdo hap që bën secili prej vendeve tona drejt BE-së është zhvillim pozitiv për të gjithë rajonin.

Vendet e Ballkanit Perëndimor gjetën në Parlamentin Europian mbështetje, jo vetëm për liberalizimin e vizave, por edhe për projekte të mëdha, për të cilat Ballkani ka shumë nevojë. Në këtë takim, Komisioneri për Zgjerim, Olli Rehn, konfirmoi se ky vit është një vit kyç për rajonin dhe progresin e tij drejt BE-së. Ai nënvizoi se dy vitet e fundit, vendet e Ballkanit Perëndimor janë përafruar me Bashkimin Europian si politikisht ashtu edhe ekonomikisht, duke shprehur bindjen se secili nga vendet e rajonit tonë i ka të gjitha potencialet për të përshpejtuar anëtarësimin në Bashkimin Europian. Parlamenti shqiptar është i nderuar për përgjegjësinë që mban, për rolin e tij qendror, si ndodh në çdo republikë parlamentare, për të përfaqësuar dhe marrë përsipër çështjet më të mëdha të këtij vendi. Një një botë që ndryshon vrullshëm, potenciali i diplomacisë parlamentare po shtrihet duke shkurtuar distancat gjeografike e duke krijuar një rrjet të gjerë bashkëpunimi mes vendeve. Diplomacia parlamentare shton kontaktet dhe kjo është arsyeja që unë dhe deputetët e Kuvendit kemi shfrytëzuar çdo rast të mundshëm për t'u takuar me autoritetet e larta të vendeve të tjera, në përpjekje për të promovuar imazhin e Shqipërisë në botë, nëpërmjet komunikimit, shkëmbimit të informacionit, paraqitjes së rezultatetve. Dhe vitet e fundit, të gjithë kemi çfarë të prezantojmë në kancelaritë perëndimore. Jam realiste nëse them me bindje se ky imazh është përmirësuar ndjeshëm dhe Shqipëria është sot atraktive për investitorë dhe turistë, gjithnjë e në rritje.

Diplomacia parlamentare është një dimension që ka rezultuar, jo vetëm i rëndësishëm, por mbi të gjitha efikas. Për natyrën e tij unike, parlamenti është jo vetëm insitucion qendror, por esencial, është institucioni që bart vullnetin dhe zërin e qytetarëve. Kjo i jep atij peshën e sovranit, por edhe një përgjegjësi të madhe. Nisur nga pavarësia që gëzon deputeti, nga diversiteti i pikëpamjeve që shfaqen në Kuvend apo shumëllojshmëria e takimeve, ky kontakt është një komponent i rëndësishëm dhe askush më mirë se parlamentarët nuk mund ta shfrytëzojë këtë dimension. Së bashku me kolegët deputetë kemi takuar shumë personalitete e kemi bërë shumë miq. Miq që na janë gjendur pranë si në ratifkimin e MSA-së, ashtu edhe në marrjen e ftesës për NATO, miq që i kemi në krah përgjatë rrugës sonë integruese dhe ne u jemi të gjithëve mirënjohës. Ne kemi kuptuar se për të drejtuar reformat në Parlament, duhet të punojmë të gjithë së bashku dhe kështu do të jemi më të besuar te qytetarët tanë dhe tek ata të Europës. Ne kemi kuptuar se demokracia nuk është diçka që arrihet një herë e përgjithmonë dhe përfundon në një moment të caktuar. Të gjithë duhet të angazhohemi pa u ndalur, për të bërë të mundur që ligjet, reformat, inisitucionet tona të përmirësohen në vijimësi, që e ardhmja jonë, e djemve dhe vajzave, e fëmijëve tanë të jetë sa më e sigurt. Përmes një pune të madhe, si Qeveri e Kuvend, kemi arritur ta bëjmë vendin tonë një vend me demokraci funksionale, një vend që po rritet, po zhvillohet, po konsolidon institucionet e tij, po shpejton me reformat, po vrapon më optimist se kurrë drejt integrimit euro-atlantik.

Kemi realizuar reforma të guximshme, që shpesh kanë ngjallur edhe debate, por gjithçka ne kemi bërë, ka patur në qendër qytetarin. Politika e reformave ka patur në plan të parë qytetarët, familjet, fëmijët. Vokacioni europian i shqiptarëve ka qenë dhe mbetet udhërrëfyesi më i mirë në reformat tona. Në Kuvend është punuar shumë për përmirësimin e legjislacionit, për të krijuar një klimë sa më të përshtatshme për rritjen e investimeve të huaja. Është debatuar shumë në komisione dhe janë miratuar në parlament ligje që ndihmojnë investitorët. Parimi ynë në reformat fiskale ka qenë gjithmonë se janë paratë e taksapaguesve shqiptarë ato që po shpenzojmë dhe prandaj kemi treguar e po tregojmë përgjegjshmëri dhe efikasitet në gjithçka që po bëjmë. Falë këtij efikasiteti, Shqipëria është sot vendi me barrën fiskale më të ulët në Europë. Si rrjedhojë e luftës kundër kontrabandës dhe evazionit fiskal, kemi rritur të ardhurat në buxhet me 23%. Janë kufizuar abuzimet dhe janë zvogluar shpenzimet administrative me 30%. Rritja ekonomike është e qendrueshmë prej 6 përqind dhe inflacioni rreth 4 përqind. Investimet publike në infrastrukturë janë katërfishuar dhe investimet e huaja janë rritur me 70 përqind. Investime të mëdha po bëhen anembanë Shqipërisë, duke sjellë një ndryshim të dukshëm dhe të prekshëm për të gjithë shqiptarët.

Jam e bindur se nëse ecim me këto ritme, Shqipëria do të njohë së shpejti një "bum" të vërtetë ekonomik. Unë jam e sigurt se Parlamenti shqiptar do vazhdojë të bëjë çdo përpjekje për përmbushjen e vizionit euro- atlantik të të gjithë shqiptarëve, sepse institucione të mëdha punojnë për qëllime të mëdha. Sfidat tona në këtë moment janë standardet zgjedhore dhe vazhdimi i reformës në drejtësi, të cilat janë në axhendën e punës së Kuvendit. Nuk ka shtet të fortë pa një drejtësi të fortë, nuk ka shtet të së drejtës pa një drejtësi të drejtë. Ndaj dhe jemi të palëkundur në vendosmësinë tonë për të krijuar një sistem drejtësie me gjyqtarë me integritet, me figura që kanë meritë për të qenë në hierarkinë e pushtetit gjyqësor. Unë besoj dhe jam optimiste se mazhoranca dhe opozita nuk do ta humbin shansin që nëpërmjet ekspertizës së tyre, të reformojnë sistemin e drejtësisë, në mënyrë që të arrijmë standardet e kërkuara. Në të njëjtën kohë, do të vijojmë punën për përmirësimin e Kodit Zgjedhor dhe brenda një kohe të shkurtër shqiptarët do të pajisen me pasaportat biometrike dhe kartat e identitetit, në mënyrë që të krijojmë të gjitha kushtet që vota e lirë e qytetarit, si themeli i demokracisë, të ketë gjithë peshën që i takon. Duke ju falenderuar për vëmendjen, dua të theksoj se dëshira dhe synimi i të gjithëve besoj se është i njëjtë: Të ndërtojmë një Europë gjithëpërfshirëse dhe jo përjashtuese, një Europë pa mure, një Europë me dhe për të gjithë qytetarët. Në fund të fundit, jemi të gjithë ne, politikanët, qytetarët, djemtë e vajzat që, përmes reformave, progresit, dinamikës, do të shkurtojmë rrugën për projektin tonë të përbashkët: Bashkimin Europian.


Rilindja Demokratike