RONALDINJO "adios"NGA BARCA TE MILAN PER 20 MILIONE ERO

Ronaldo de Assis Moreira, ose i njohur ndryshe Ronaldinjo është futbollisti më i ri i Milanit. Braziliani do të prezantohet sot para shtypit në Milano ku do të zyrtarizohet përfundimisht edhe tratativa e shumë-përfolur. Dje në mesditë administratori i deleguar i kuqezinjve, Adriano Galiani me "bekimin" natyrisht edhe të presidentit, Silvio Berluskoni ka pranuar të derdhë në xhepat e presidentit të Barcelonës, Laporta shumë e 20 milionë eurove për të pasur shërbimet e Ronaldinjos. Mbrëmë në darkë zëvendës/presidenti milanez, Galiani është rikthyer në Milano së bashku me brazilianin që prej ditës së sotme mund të nisë stërvitjen me skuadrën e Milanit. Braziliani do të përfitojë një rrogë prej 6.5 milionë eurosh neto në sezon, shifër kjo shumë më e ulët ngasa u kërkua një vit më parë nga menaxheri i futbollistit, njëkohësisht vëllai i tij. Ronaldinjo nuk do të jetë lojtari më i paguar te Milan sikundër pretendohej nga ai (Kaka paguhet 9 milionë euro neto në sezon), por gjithsesi përkundër rrjedhës së ngjarjeve duket se më tepër se drejtuesit e Milanit janë pala e futbollistit që kanë dalë më të fituar. Ronaldinjo u nxorr në "pension" të parakohshëm që 7 javë para fundit të kampionatit spanjoll nga ish-trajneri i Barcelonës, Frenki Rajkard. Sipas informacioneve futbollisti ishte i dëmtuar por në të vërtetë në muajt e fundit përreth Ronaldinjos u krijua një ambient negativ i kushtëzuar edhe nga forma e dobët që lojtari po shfaqte në ndeshjet me Barcelonën. Gjithsesi tashmë problemi kryesor i mbetet trajnerit të Milanit, Karlo Ançelotit i cili duhet të vendosë se kë duhet të zgjedhë në një mesfushë të mbipopulluar me "Yje" si Kaka, Sedorf, Pirlo, Gatuzo, Ambrosini, Flamini dhe së fundmi edhe Ronaldinjo.

Ronaldinho

Skeda
Datëlindja: 21.03.1980; Vendlindja: Porto Alegre, Brazil;
Gjatësia: 1.81 m; Pozicioni: Mesfushor ofensiv; Skuadra: AC Milan
Karriera
1997-2001: Gremio, Brazil (35 ndeshje, 14 gola);
2001-2003: Paris
Saint-Germain, Francë
(55 ndeshje, 17 gola); 2003-2008: Barcelona, Spanjë (145 ndeshje, 70 gola);
2008-në vazhdim:
AC Milan, Itali
Me kombëtaren braziliane:
1999-në vazhdim
(82 ndeshje, 32 gola)

Trofe (në rang klubi)
1999: Kampionatin e Rio Grande
(me Gremio)
1999: Kupën e Rio Grande (me Gremio)
2001: Intertoto Cup
(me PSG)
2005, 2006: Kampionatin spanjoll (me Barcelonën)
2005, 2006: Superkupën spanjolle (me Barcelonën)
2006: Kupën e Kampioneve
(me Barcelonën)
1997: Kupën e Botës
U-17 (me Brazilin)
1999: Kupën e Amerikës (me Brazilin)
2002: Kupën e Botës (me Brazilin)
2005: Kupën e Konfederatave
(me Brazilin)

Trofe (individualë)
2004, 2005:
Futbollisti më i mirë i vitit
2004, 2005:
"Topi i Artë"
2005: Futbollisti më i mirë në Evropë
2005, 2006, 2007: Futbollisti më i mirë i FIFPro
2005-2006: Futbollisti më i mirë i Champions
2004-2005: Sulmuesi më i mirë i Champions
2004, 2005, 2006: Pjesë e skuadrës së vitit
2004, 2006: Futbollisti më i mirë i huaj në Primera Division