Berisha: Akuzat e Rusisë, shpikje me synime konstante antishqiptare

Kryeministri shqiptar Sali Berisha dhe homologu i tij islandez diskutuan dje edhe për situatën më të fundit në Gjeorgji dhe pasojat e agresionit rus në këtë vend. Kryeministri Sali Berisha i mohoi akuzat e ngritura nga Rusia se Shqipëria i ka shitur armë Gjeorgjisë. Në konferencën e përbashkët me kryeministrin e Islandës Haarde, Berisha iu përgjigj akuzave të Moskës, se “të mendosh se Gjeorgjia paska nevojë për armët e Shqipërisë, është një shpikje”. “Gjeorgjia është një vend që ka pasur armët e veta dhe ushtrinë e vet”, deklaroi Berisha. Shefi i ekzekutivit shqiptar tha se nuk ishte i habitur me sulmin rus dhe se këto sulme kanë një qëllim konstant ndaj shqiptarëve. “Akuzat ruse nuk më çudisin Ka një qëndrim konstant ndaj shqiptarëve. Për mendimin tim qëndrimi rus ndaj vendeve të vogla është jashtëzakonisht I dënueshëm. Një ditë sulmon një vend, ditën tjetër bën deklarata kundër anëtarësimit të Shqipërisë dhe Kroacisë në NATO”, përfundoi deklaratën e tij kreu i qeverisë shqiptare Sali Berisha. Kreu i shtabit të ushtrisë ruse, gjenerali Anatoly Nogovitsyn dy ditë më parë pat akuzuar Shqipërinë dhe vende të tjera të Ballkanit dhe të Europës Lindore si Maqedonia, Bullgaria, Ukraina, Hungaria apo Rumania se kanë funizuar me armë Gjeorgjinë. Më herët akoma, Rusia pat mbajtur qendrim shumë obstruksionist ndaj anëtarësimit të vendeve të Ballkanit në NATO si dhe ndaj vendosjes së sistemit antiraketë në Evropë, por duket se kjo retorikë po respekton traditën e pansllavizmit dhe të ringjalljes së ambicies perandorake, përmes mbeturinave të KGBsë, që sot duket se po kërkojnë të riorganizohen në një shtet të madh autokratik. ...