TRAGJEDIA E BUTRINTIT GJENDET TRUPI I 17 VJECARIT MYFTARI

SARANDË - Rëndohet bilanci i tragjedisë së Butrintit duke çuar në 5 numrin e viktimave. Në orët e mesditës polumbarët kanë nxjerrë nga ujërat e liqenit trupin e pajetë të 17 vjeçarit Ndriçim Myftari nga rrethi i Lushnjes. 17-vjeçari ishte shpallur i zhdukur pas tragjedisë së ndodhur të dielën në mbrëmje, por sot trupi i tij është gjetur nga polumbarët, dhe më pas është identifikuar edhe nga familjarët.Sipas korrespondentes së “News24” mësohet se trupi i pajetë është nxjerrë sot nga liqeni i Butrintit në prani të familjarëve. Trupi i viktimës është dërguar menjëherë në morgun e Sarandës ku ka qenë daja i tij ai i cili ka bërë edhe identifikimin e trupit të Ndriçim Myftarit.Zhdukja e Ndriçim Myftarit është bërë e ditur nga klandestinët e mbijetuar nga tragjedia dhe nga familjarët e tij. Këta të fundit deklaruan humbjen e tij duke u shprehur të bindur se 17-vjeçari ndodhej në varkën që u mbyt në ujërat e liqenit të Butrintit mbrëmjen e së dielës.Ndërkohë viktimë e kësaj tragjedie kanë mbetur edhe katër persona të tjerë mes të cilëve edhe një vajzë 3 muajshe së bashku me nënë e saj.Të mbijetuarit e kësaj tragjedie dëshmuan se tentuan të kalojnë kufirin në mënyrë ilegale për shkak të mungesës së dokumentacionit të ligjshëm për të prekur kufirin grek. Sipas tyre kushtet ekonomike i detyruan të lënë atdheun për të gjetur punë në Greqi që të mund të mbanin familjet me të ardhura.Aktualisht mësohet se 13 polumbarët që kërkuan sot në liqen kanë ndërprerë kërkimet duke lënë të kuptohet se 17-vjeçari nga Lushnja mund të jetë edhe viktima e fundit e tragjedisë së Butrintit.Megjithatë ende nuk është bërë reagimi zyrtar i Policisë së Shtetit i cili pritet të deklarojë nëse operacioni i kërkimit është ndërprerë përfundimisht sot apo do të vazhdojë edhe në ditët në vazhdim.