TIRANE DJALI VRET BABANE PER NJE BARRE DRU

TIRANE -Ka preferuar më mirë t'i fusë një breshëri automatiku të atit, sesa të shkonte të bënte dru në mal. Ngjarja e rëndë ka ndodhur mbrëmjen e së mërkurës në fshatin Mal Mnerr të Komunës Zall- Bastar në Tiranë. Elton Lila, 16 vjeç, pas një grindjeje në banesë ka qëlluar me automatik tip 'Kallashnikov' për vdekje të atin Mehmet Lila, 55 vjeç. Mesditën e djeshme shërbimet e Komisariatit numër 4 të Policisë së Tiranës, kishin mundësuar shoqërimin dhe ndalimin e të birit Eltonit, si autor të vrasjes. Fillimisht, 16-vjeçari nuk e ka pranuar krimin, por më vonë është munduar ta justifikonte me faktin se babai e rrihte dhe e kishte kryer për vetëmbrojtje.
Ngjarja
Mehmeti i kishte dhënë detyrë që të bënte dru në mal të birit, Eltonit. Mbrëmjen e së mërkurës kur janë ulur për të ngrënë darkë, Mehmeti ka nisur t'i bërtasë të birit pse nuk kishte përfunduar detyrën. Kjo mësohet se ishte detyra e disatë që Eltoni nuk kishte kryer, gjë që e ka nervozuar të atin që të bërtiste dhe shante. Nga dëshmitë e marra në polici, Mehmeti i ka kujtuar edhe ushqimin të birit, që sipas tij nuk e meritonte dhe kjo ka sjellë reagimin e Eltonit. Në grindje e sipër, ky i fundit ka rrëmbyer armën dhe ka qëlluar në drejtim të të atit.
Arrestimi
Policia është sinjalizuar në orët e para të ditës së djeshme për ngjarjen. Shërbimet e Komisariatit numër 4 të Policisë së Tiranës kanë shoqëruar të gjithë personat e dyshuar si autorë të ngjarjes, apo që mund të kishin dijeni. Mes të shoqëruarve mësohet se ishte edhe Eltoni, por që nuk e kishte pranuar autorësinë. Oficerët e komisariatit dhe ata të seksionit të krimeve kundër jetës dhe shëndetit, kanë intervistuar Eltonin. Oficerëve u janë dashur disa orë për të "zbërthyer" dhe mësuar të vërtetën për ngjarjen. Eltoni është siguruar në ambientet e izolimit me akuzat e "vrasjes" dhe "armëmbajtjes pa leje".



balkanweb