JUVENTUS FITON 4-0 KUNDER SLLOVAKEVE

Ndonëse mungon në Ligën e Kampioneve prej dy vitesh, rikthimi i Juventusit në kompeticionin më të rëndësishëm evropian për klube është i mrekullueshëm. Katër gola në 90 minuta janë një ogur shumë i mirë për një sezon që pritet të jetë mjaft impenjativ për“Zonjën e Vjetër”. Pavarësisht mungesave të shumta në formacionin e hedhur në fushë nga Klaudio Ranieri, Juve nuk duket se i vuan ato përballë një kundërshtari, i cili nuk arrin kurrë të vërë në vështirësi portën e mbrojtur nga Xhanluixhi Bufon. Juventinëve i ka munguar shumë aroma e Ligës së Kampioneve dhe një gjë e tillë dallohet qartë që në minutat e para të sfidës, ku Del Piero me shokët e tij kërkojnë menjëherë golin e avantazhit, i cili nuk do të vonojë. Minuta e shtatë dhe Mauro German Kamoranezi kalon në avantazh bardhezinjtë me një goditje të fortë brenda zonës. Ky episod i jep një marsh më shumë djemve të Ranierit, të cilët dyfishojnë shifrat pas 20 minutash me një gol fantastik të kapitenit Alesandro Del Piero. Një gjuajtje potente jashtë zonës së rreptësisë përfundon nën traversën e mbrojtur nga portieri i formacionit sllovak, dhe 2-0 për Juventusin.Gjithsesi, emocionet e pjesës së parë nuk përfundojnë këtu, pasi mbrojtësi Xhorxho Kielini shënon golin e tretë në minutën e 39-të. Ai që do të vulosë kualifikimin për Juven është një tjetër mbrojtës, Legrotalje, në minutën e 90-të.