TIRANE ARRESTOHET I FORTI I FIERIT

Arben Isufaj, i njohur si i forti i Fierit, akuzohet për vrasje e trafik droge

Specialët prangosin Arben Isufajn, i njohur si “Ben Qimja”, personin që për vite me radhë i shmangej policisë, ndërsa mbi supe kishte një mal me akuza nga më të rëndat, duke nisur nga vrasja e në përfundim me trafik droge.

Ndërkohë mësohet se në datën 12 maj të vitit të kaluar, në vendin e quajtur

“Sheq i Madh”, Fier, u organizua operacioni policor për kapjen dhe ndalimin e vëllait të tij, Ahmet Isufaj, i shpallur në kërkim nga Drejtoria e Policisë së qarkut Durrës për veprën penale të “trafikut të narkotikëve”.

Gjatë operacionit, në ndihmë të tij duke kërcënuar me armë zjarri punonjësit e policisë, ka vepruar edhe shtetasi Arben Isufaj, duke bërë të mundur largimin e personit të kërkuarit Ahmet Isufaj.

Arrestimi

Fieraku Arben Isufaj, 37-vjeçari që nga të gjithë njihej si “Ben Qimja” u arrestua pasditen e djeshme në një lokal, fare pranë Kopshtit Botanik në Tiranë, teksa po pinte kafenë e pasdites në shoqërinë e miqve të tij. Informacionet e sakta nga policia e Tiranës dhe koordinimi i punës me njësitë operacionale që e hetonin prej të paktën dy javësh mbërritjen e tij në kryeqytet, ishin dy nga metodat për prangosjen e tij, të cilat rezultuan të suksesshme. Sipas burimeve konfidenciale të policisë, i akuzuari për shumë krime kishte shfaqur habi të plotë kur po arrestohej, por nuk tentoi të kundërshtonte askënd, duke zgjatur duart në pranga, por me një buzëqeshje kaloi vështrimin tek tavolina e miqve.

Akuzat

Kështu, mbaron edhe saga e gjatë e një të forti nga Fieri që në hetime rezultonte herë i implikuar në transportin e qindra kilogramëve kokainë në llogari të Aldo Bares e bandës së tij të Lushnjës për në Itali apo të sasive të tjera të hashashit për të tjera grupe kriminale. Gjithashtu, ai mban akuzën e vrasjes mbi shpatulla, pa llogaritur pritat që i ngrinte policisë, ku për fat gjithnjë ia dilte të arratisej. Prokuroria ka mbyllur disa dosje për të, por me ndihmën e të njohurve Ben Qimja kishte mundur t’u shmangej disa dënimeve.

Vrasja e Pirro Koçiut, gushtin e vitit 2002, ndonëse ka për autor Fatlum Kadinë, përmban edhe implikimin e Isufajt. Policia dyshon se ai ka marrë pjesë në këtë ekzekutim, por nga ana tjetër akuzat për trafik droge për Aldo Baren, ende mbetën të pavërtetuara nga rrugët zyrtare të hetimit, ashtu siç janë të dokumentuara trafiqet e kuintalëve të hashashit.

Vazhdojnë hetimet nga policia e Fierit

Ben Qimja, autor i 3 vrasjeve në Fier

Arben Isufaj, i njohur në qytetin e Fierit me pseudonimin “Ben Qimja”, edhe pse person në kërkim për vepra të rënda penale, i dyshuar për trafik ndërkombëtar droge dhe vrasje, prej vitesh i shmangej policisë.

Midis të tjerave Ben Qimja akuzohet për vrasjen e pronarit të “Kuz Çamasë” në Fier.

Sipas burimeve jozyrtare nga policia e Fierit, mësohet se shkaku i sherrit mes Ben Qimes dhe Ladi Hasanit (pronar i Kuz Çamasë) ka qenë vrasja e babait të Ben Isufajt, Enver Isufaj në vitin 1995 pikërisht në pragun e shtëpisë së tij në lagjen periferike të qytetit të Fierit, Sheq i Madh.

Pas kësaj Ben Qimja mendon të hakmerret, duke vrarë fillimisht Ladin dhe më pas vëllanë e tij Ruzhdiun.

Për policinë e Fierit, mbi Ben Qimen, bien akuza edhe për vrasje të tjera.

Në vitin 2002 Arben Isufaj, i njohur si Ben Qimja, vret në Spanjë Enver Koçiun, sherri mes të cilëve kish nisur herët dhe mendohet se Ladi Hasani ka qenë ndërmjetës për t’i pajtuar.

Po kështu, në vitin 2002 në qendër të qytetit të Fierit vriten Julian Isufaj (nipi i Ben Qimes) dhe Bledar Kastrati, të cilët kanë qenë së bashku në një automjet fuoristradë, autori i së cilës është kapur shumë më vonë nga policia e Fierit.