BANORET E QYTETIT STUDENTI DO TE KENE NJE RRITJE 10% NE PAGESE

Çmimet e dhomave për secilin konviktor në Qytetin Studenti këtë vit pritet që të rriten me 10 për qind krahasuar me një vit më parë. Kjo shtesë në pagesën vjetore bëhet nën arsyetimin e kërkesës së lartë për investime në qytezën studentore, ku çdo vit strehohen mbi 6700 të rinj nga thuajse të gjitha rrethet e vendit.

Drejtori i përgjithshëm i administratës së Qytetit Studenti, Bujar Brovina, pohon për gazetën "Shqip" se "po mendohet të realizohet një rritje e çmimit për qëndrimin në konvikt, që do të jetë në masën 10 për qind". Kjo shpjegohet nga ana e tij me faktin se, "shpenzimet për përmirësimin e kushteve në qytezë janë të larta dhe kërkojnë një investim më të madh". Shuma e paguar për regjistrim nga studentët vitin e kaluar ka qenë 26500 lekë të reja. Kjo tarifë është vjetore dhe pagesa kryhet nga studentët në ditën që marrin në dorëzim dhomën në konvikt. Drejtori Brovina shprehet më tej se "ende nuk është caktuar përfundimisht nëse do të rritet ‘qiraja‘ në Qytetin Studenti, por kjo do të mundësonte përmirësimin e cilësisë së shërbimit ndaj të rinjve që do të jetojnë aty përgjatë këtij viti akademik".

Qyteti Studenti zotëron në total 25 mijë dhoma, nga të cilat 4 bujtina janë në rindërtim dhe pjesa tjetër janë në përgatitjet e fundit për të pritur 6700 studentë që strehohen pranë kësaj qyteze.

Shqetësimi

Problematike në Qytetin Studenti, sqaron Brovina, mbetet pastrimi i territoreve të tij, detyrim që duhet të mbulohet nga Bashkia e Tiranës. Kjo pasi, sikundër thotë drejtori Brovina, taksa e pastrim-gjelbërimit që bëhet nga ana e subjekteve private, nuk kalon në buxhetin e Qytetit Studenti, por i shkon pushtetit vendor. "Megjithëse, vazhdon ai, është bërë kërkesë pranë Njësisë Bashkiake numër 2, por nuk kemi marrë asnjë përgjigje deri tani". Momentalisht, tregon drejtori i përgjithshëm i Qytetit Studenti, pastrimi bëhet nga vetë struktura përkatëse që ne kemi. Sipas Brovinës, shqetësuese në këtë territor universitar për të rinjtë mbetet sistemi i ngrohjes, si dhe kompletimi i dhomave me internet. Kështu, sistemi i ngrohjes me kaldaja funksionon vetëm për 40 për qind të dhomave në Qytetin Studenti. Pjesa tjetër e të rinjve përdorin si mjete ngrohëse kaloriferët e vendosur në përdorim. Por, thekson Brovina, po punohet për të sjellë në jetë një projekt për funksionimin e kaldajave, që pritet të fillojë së shpejti.

Për sa i përket vendosjes së internetit në të gjitha dhomat e bujtinave, Brovina tregon se "po punohet me kompani private për të zgjedhur opsionin më të mirë dhe më ekonomik për t‘iu ofruar lehtësime studentëve". Kërkesa jonë, sqaron ai, është që Ministria e Ekonomisë dhe ajo e Arsimit të na mbështesë në idenë tonë: "lundrim" falas në internet, ose në të kundërt studentët do të duhet të paguajnë çmimin që kompania private do të vendosë. "Deri tani 900 lekë ka qenë shuma më e vlefshme e ofruar, por ende projekti nuk ka arritur në "finish", thekson drejtori i bujtinave studentore të Universitetit të Tiranës.

Sipas tij, mbeten për t‘u përmirësuar edhe këndet sportive, sepse qendra më e madhe e konvikteve në kryeqytet nuk zotëron një ambient sportiv në shërbim të studentëve. Terrenet sportive janë nën varësi të rektoratit. Përkujdesja për to iu kalon atyre, sepse në universitet sporti është akoma lëndë mësimdhënieje.

Popullimi

Raporti midis femrave dhe meshkujve që jetojnë në Qytetin Studenti është në favor të të rejave. Rreth 65 për qind të popullsisë në qytetin me moshën më të re në vend e zënë femrat dhe vetëm 35 për qind e tij popullohet nga meshkujt, të cilët kanë "zgjedhur" të jetojnë në bujtinat e konviktit të UT-së. Drejtori i konvikteve e shpjegon këtë raport të zhdrejtë duke thënë se "të drejtën për të studiuar e fitojnë më shumë femrat se sa meshkujt", por edhe nga fakti që "një pjesë e djemve zgjedhin në shumicën e rasteve shtëpi me qira, se sa jetesën në konvikt".

Në këtë situatë drejtori Brovina, së bashku me stafin e tij, e kanë konsideruar si më të udhës që të merren me shtimin e godinave për femrat, duke vërejtur edhe fluksin që ka. Ndaj po mendohet edhe ngritja e godinave të reja, që do të mirëpresin sërish gjininë femërore që mbush auditorët universitarë.

Strehim në bujtinat e Tiranës, nuk gjejnë vetëm studentët shqiptarë, por edhe ata të huaj, tregon drejtori i Qytetit Studenti. Sipas tij, shumica e studentëve të huaj janë nga Ballkani. "Janë gjithsej 32 të huaj që presin të akomodohen në godinat e Qytetit Studenti, me të njëjtin status si dhe studentët shqiptarë", saktëson ai.

Çdo godinë ka në përbërjen e saj mbi 200 punonjës, të cilët merren me mbarëvajtjen e punës. Brovina tregon se ka pasur raste të shpërdorimit të detyrës dhe mitëmarrje nga ana e administratorëve, por ekziston një adresë postare që studentët e kanë "të instaluar" në çdo godinë dhe mund të postojnë ankesat. Ai shprehet se ka pasur edhe masa administrative, deri në largim nga puna. Por thekson se edhe nga ana e studentëve duhet të ketë përgjegjësi për çdo veprim. Problem mbeten edhe dushet në konvikte.

"Jemi të detyruar që dushet t‘i hapim vetëm tri orë në ditë, prej orës 12:00 deri në 15:00, pasi shumica e tyre shkatërrohen nga vetë përdoruesit", thotë drejtori. Çdo kat mban gjithsej pesë dushe, 18 dhoma dhe nga tre persona për çdo dhomë. Janë marrë masa edhe ndaj studentëve të "këqij", ankesat për të cilët kanë shkuar deri në dekanat. Madje ka pasur edhe përjashtime nga konvikti, thotë drejtuesi i Qytetit Studenti.