STUDIMET NE ITALI JO PA CERTIFIKATEN E MATURES

TIRANE-Ambasada Italiane në Tiranë njofton se pranë Zyrës Konsullore të Tiranës dhe selive konsullore të Shkodrës dhe Vlorës është tashmë në fazë përfundimi procesi i vlerësimit të dokumentacionit të paraqitur nga studentët shqiptarë që dëshirojnë të regjistrohen në Universitetet italiane. Ambasada Italiane thekson se rregullat për regjistrimin pranë Universiteteve italiane dhe për marrjen e vizës studim/universitet janë paraqitur në komunikatat e shtypit të datave 29 maj dhe 10 korrik, u janë dërguar organeve kryesore te informacionit, janë publikuar në adresën www.ambtirana.esteri.it, janë përsëritur në kartelat që janë shpërndarë pa pagesë pranë Ambasades dhe janë reklamuar në njoftimet e afishuara pranë Ambasadës dhe selive konsullore. Zyrat konsullore italiane në Shqipëri, ashtu si të gjitha Përfaqësitë diplomatike-konsullore italiane në botë, janë të detyruara të zbatojnë urdhëresat e Ministrisë së Arsimit, Universitetit dhe Kërkimit të Republikës së Italisë për trevjeçarin 2008-2011 për regjistrimin e studentëve të huaj në Universitetet italiane. Këto urdhëresa, të përsëritura rregullisht nga Ambasada dhe të konsultueshme në adresën www.miur.it, ashtu si edhe në adresën www.ambtirana.esteri.it, përcaktojnë në mënyrë të qartë se për t'u regjistruar në Universitetet italiane kërkohen të njëjtët tituj studimi të cilët nevojiten për regjistrim edhe në Universitet Shqiptare (pika I 1). Pra, një student shqiptar që dëshiron të regjistrohet në një Universitet italian duhet të zotërojë, veç Dëftesës së Pjekurisë edhe certifikatën e Maturës Shtetërore, ashtu si kërkohet edhe për regjistrimin në Universitetet shqiptare.




















(d.b/GazetaShqiptare/Balkanweb)